قوة عقلك الباطن و تأثيرها على حياتك
كتبت: نورهان مسعد
بنواجه انواع كتيرة من الناس اللي بنقابلهم في يومنا ، ناس بشخصيات و معتقدات و أفكار مختلفة ، ناس الإيجابية بتطلع من عنيهم و بمجرد ما بتقابلهم بتحس انك بتحب الحياة كدا ونفسك تتعلم حاجات كتير م الاخر يعني تأثيرهم عليك جميل جدا، وناس تانية اعوذ بالله عارفين عم ضياء اللي في مسلسل الوصية بتاع كله رايح اهو دا بضبط الشخص النكدي المتشائم اللي قصدي عليه ، الناس اللي زي عم ضياء دي موجودين في يومنا بشكل كبير بيبقى ليهم تأثير كبير جدًا على حياتنا ممكن تكون بتقول في بالك لا لا انا مش بتأثر بكلام الناس دي ده انا باخد كلامهم بهزار، لكن الحقيقة غير كدا لانك مسمعتش قبل كدا عن "قوة التكرار" .
يعني ايه قوة التكرار؟
قوة التكرار هي الكلمات اللي بتفضل تتخزن في عقلك الباطن اللي بيكوّن أفكارك ومعتقداتك في الاساس ، بمعنى إن عم ضياء اللي في حياتك لما تيجي تقوله مثلا تعالى نفتح مشروع يقولك مشروع ايه هو احنا لاقيين ناكل و هنجيب فلوس منين في الزمن دا و يخليك تندم إن الفكرة جت على دماغك اصلا ، تقوله طب بلاها مشاريع تعالى ناخد كورس يقولك كورسات ايه هي الكورسات هتأكلنا عيش ، دا انت والله لو قولتله ايه دا هي القهوة مُرة كدا ليه هيقولك مش أمر من الايام اللي احنا عايشينها.
كل الكلام ده بيحصل معانا على طول و للاسف بيتخزن في عقلك الباطن لغاية م تبقى عم ضياء جديد بنفس المعتقدات و الأفكار المتخلفة دي وبتدمر مستقبلك بإيديك وبتضيع سنين عمرك كلها ف إنك خايف تاخد خطوة سواء بقا خايف من كلام الناس أو خايف إنك تفشل .
طيب ازاي نموت عم ضياء اللي جوانا؟
اولا هتحتاج تكرر كلمات إيجابية دايما في دماغك زي: انا عندي مهارات كتيرة ، انا اقدر اتعلم اي حاجة وانجح فيها و هكذا لازم تكررها لغاية م تبقى جزء من معتقداتك و أفكارك.
لازم تعرف إن السلبية بتمنع القرار و بتقتل أملنا الداخلي ، يبقا لازم تتخلص من كل الأفكار السلبية اللي في دماغك لإن بكل بساطة عقلك الباطن مش بيفرق بين الأفكار الإيجابية و السلبية يعني اي حاجة بتتقال قدامه بيخزنها و يكوّن شخصيتك ف بيكون مفكر إنك مرتاح للشكوى و التذمر اللي بتقعد تفكر فيها كل يوم الصبح ف خلاها بقت عادة عندك كل يوم لازم تعملها، ف عشان كدا لازم تفلتر الأفكار اللي هتتخزن في عقلك الباطن.
وبس كدا، خليك عارف إن مفيش حاجة بتوقفك عن خطوة النجاح غير أفكارك ، وعشان كدا خليك شجاع و واجه مخاوفك، و توكل على الله وتعوذ برعايته و حمايته.
تعليقات
إرسال تعليق