قهوة باليورانيوم
كتبت رؤية وائل
ما هو اكيد اللي كتب " شاي بالنعناع " يكتب " قهوة باليورانيوم" بس اشمعنا اليورانيوم؟!
ليه مثلا مش قهوه الزركونيوم ؟!أو الجرمانيوم؟!!
دايما المقالات تلاقيها فيها حته سياسة كده، السياسة اكتسحت جميع المجالات، بس النهارده كتابنا خالي من السياسة، وجواه قصص وحواديت مش بس هتقراها لا ده كمان تسمع صوتها في دماغك.
بصراحه بحى دكتور احمد خالد توفيق على الكتاب ده، مش بس ده يا دكتور لا انا بحيي حضرتك على كتاباتك كلها اللي خارج الصندوق.
مش هحرق لكم الكتاب هقولكم النقط اللي شدتني واذا مكنش الكتاب كله شدني بس هحاول محرقش.
○رمضان جانا..
شهر رمضان ده دايما بيكون لي ريحه وصوت مختلفين عن اي شهر، بس المرة دي لو جيت تقارن ما بين رمضان بتاع نيللي وشريهان و فوازير ثلاثي أضواء المسرح برمضان بتاع محمد رمضان واخواته اللي في كل مسلسل بياكلوا حقه وابوه اللي بيموت دايما، دمعته اللي دايما تنزل من عين واحده، هتلاقي ان في اختلاف كبير ما بين ايامنا وايام سنوحي وحابي والمفتش كرومبو اللي دايما فوازيره ما كانتش بتخلينا ننام من كتر ما بنفكر في حلها.
ولا ريحه الفجر وقت السحور وصوت جرس بتاع البليلة والفول وصوت وريحه البومب والصواريخ بعد الفطار وقبل صلاه التراويح، ولا فرحتنا لما المدفع يضرب نتلم كلنا حوالين بعض على الطبليه وتيته وجدو معانا واحنا بنتخانق مين فينا يقعد جنبهم، تيجي تبص لفوانيس دلوقتي اللي كلها عبث من باربي وهي بتغني العنب العنب لسبونج بوب وهو عمال يلف حوالين نفسه والقرد ابو طبله كمان ايه ده؟! مش بقولك عبث.
نسينا الفوانيس الصفيح ام شمعه اللي سهله انك تفكها وتلعب بيها، صوت القرآن مابيفرقش الراديو ولا صوت الراجل اللي بيقول بصوت عالى "اللهم صلى على حضرة النبي يييي" ، اه لسه عبد العزيز محمود وعبد المطلب بيقولوا مرحب شهر الصوم مرحب…رمضان جانا، بس يؤسفني اقول لك ان رمضان دلوقتي مش هو رمضان بتاع زمان خالص.
○خداع النفس فن..
وهنا دكتور احمد مش قصده على جملة "الشيطان خلاني اعمل كذا" ولا زي ما كانت ريا وسكينه بيقولوا لم يخدروا الستات وياخدوا سيغتهم ويدفنوهم تحت الأرض "قدر ومكتووب يا سعت البيه".
لا هو قصده أنك تخدع نفسك وتصدق وتسوق فيها وفي الاخر تقول "حسبي الله ونعم الوكيل فيهم هم السبب"
زي انك تغش في امتحاناتك ومتأكد ان اجاباتك غاششها صح وتتفاجئ بالنتيجة فيها درجة نقصه وتقول ازاي ونعمل اعادة تصحيح وإنهم ظلموني في درجة مع انك غاشش الامتحان اصلا.
هنا دكتور احمد بيديك كذا مثال يفهمك ايه هو خداع النفس وإن في ناس بتكون حريفه في نوع الخداع ده.
○تان تان..
" تفاصيل كهذه هي التي تصنعنا…مساء الشتاء البارد والنوم المبكر، ثم الاستيقاظ في طور السِنه، غير مدرك هل انت تحلم أم أنك متيقظ، فقط لتنطبع القبله على جبيني الدافئ وتلمس أرنبة أنف أبي البارده وجهي، ثم اجد مجلة تان تان في يدي لقد ابتاعها وهو عائد من العمل، وهذا يعني ان كنا في مساء السبت، انام والمجله في يدي على الوساده…. رائحة الحبر الملون… والورد العطره…"
انت فاكرني هكمل ولا ايه! احرق لكم الكتاب يعني؟!
هنا دكتور احمد بيتكلم عن ذكريات الطفولة الجميلة، وأنه أقصى ما يتمناه ان باباه يجيبله مجلة تان تان وهو راجع من الشغل.
دكتور احمد خالد توفيق عمره ما فشل انه يخليني انبهر بكتاباته واسلوبه، دائما تلاقي الابتسامه مبتفرقش وشك طول ما انت بتقرا له تحياتي لدكتور أحمد خالد توفيق.
قولولي اي اكتر جزئية عجبتكم.
تعليقات
إرسال تعليق