إحمي نفسك من الزلزال
كتبت: نورهان مسعد
قبل اي حاجة عايزين نعرف الزلزال بيحصل ازاي؛ القشرة الأرضية بتكون عبارة عن قشرة رقيقة من الصخور اسمها الصفائح التكتونية، الصفائح دي بقا بيجي عليها وقت وبتتحرك من مكانها و بتحتك مع صفائح تانية جمبها و دا بيحصل بسبب الطاقة و الحرارة المحبوسة في باطن الأرض و اللي بتبقى عايزة تخرج لسطح الأرض بأي طريقة ف الاحتكاكات دي بتحصل على فترات و بتطلع لينا على هيئة موجات اهتزازية، طبعًا في أسباب كتيرة و لكن دا أشهرها.
نرجع بقا لموضوعنا الأساسي وهو ازاي تحمي نفسك من الزلزال؟ :
- اول و أهم حاجة لازم تهدي نفسك و تهدي اللي حواليك بقدر الإمكان لأن الدراسات أثبتت إن الخوف و الهلع اللي بيحصل للإنسان بيخليه ميعرفش يتصرف صح و بالتالي بيؤدي إلى زيادة في الخساير.
طيب لو حصل الزلزال وانت في البيت تعمل ايه؟!
اول حاجة لو عندك إمكانية إنك تطلع في الشارع في وقت قصير جدًا اطلع لإنك هتكون في امان اكتر، لكن لو خروجك هياخد وقت الاحسن إنك تعمل اللي هقولك عليه وهو إنك تبعد عن اي حاجة ممكن تتكسر زي الشباك أو النجفة أو المرايا و بعدين تنزل تحت اي ترابيزة او مكتب و تحمي راسك و رقبتك بإيدك أو بالمخدة عشان تضمن بنسبة كبيرة ميحصلكش ارتجاج لقدر الله.
وطبعًا اوعى تستخدم الاسانسير لأنه يا هيتعطل يا هيقع بيك.
ولو حصل الزلزال و انت ف الشارع المفروض تتصرف ازاي ؟!
- روح على اقرب ساحة فاضية بعيد عن اي شجر أو عواميد نور أو مباني.
وبس كدا ، إن شاء الله تكونوا استفدتوا و ربنا يسلمنا جميعًا و يرحم ضحايا الزلزال و يصبر اهلهم و ذويهم.
تعليقات
إرسال تعليق