الوسواس القهري ocd

  غرفة ٢٠٧

كتبت رؤية وائل 

دايما كده دكتوراحمد مبهدلنا معاه بكتاباته دي، فلوسنا دايما رايحة على كتبه.

بس المرة دي دكتور احمد خالد توفيق اتشهر بنوع ثاني من الكتابات وهو الرعب والاثارة، مش بس مجرد كتابة ده أتقن كتابتها جدا لدرجة انه اكثر حاجه اتشهر بيها هي رواياته المرعبة وأنه يعرف يدخلك القصة ويطلعك منها وانت مش فاهم طرف الخيط فين او ايه هو سر الرواية.

وطبعا من كتر جمال الرواية الدراما المصرية قالت لا احنا لازم يطلعلنا مصلحة من الرواية. قاموا مجسدين الرواية دي، وفعلا اتعمل مسلسل غرفه 207 وعمل ضجة جامدة جدا وطلع ترند كمان.

طبعا هتردوا تقولولى وانتِ بقى جاية تحكلنا المسلسل ول الرواية هرد واقولك لا انا جايه اشوقكم لقراءة الرواية اللي بجد من احلى الروايات اللي هتاخد عقلك في حته تانية خالص و توديه وتجيبه وتقعدك قدام برواز صورته بتتغير كل شوية بصورة شخص جديد هيموت بالطريقة اللي في الصورة.

البرواز ده محطوط في غرفة 207، واي حد يجي ويسكن من الاوضة دي واللي هي بتكون مختراه، صورته بتظهر في البرواز ميت بطريقة معينة والمشكلة فعلا انه على اخر الليل بتلاقيه ميت بنفس الشكل اللي في الصورة.

 طب ويا ترى ده بيكون حظهم الاسود؟ هقولك لا كل واحد فيهم جاي الاوتيل وراه قصة بغلطة هو عملها، وكل اللي بتعمله الاوضة دي انها بتصفي حسابه بس.

طب وهتقولي هي كده ما بتعملش حاجه غلط. هقولك اه وده هتفهمه في اخر الروايه مش هحرقه عليك.

بطل الرواية معانا هو " جمال الصواف " اللي جسده كويس جدا ونجح في ده الممثل الشهير " محمد فراج " وكان معاه ريهام عبد الغفور، ناردين فرج، مراد مكرم، كامل الباشا، يوسف عثمان ومريم الخشت، واللي أخرجوا استاذ " محمد بكير" ، طاقم العمل اجتهد فعلا انه يطلع المسلسل هو قصة الرواية.

 القصة..

أحداث المسلسل بتدور حوالين أن جمال الصواف جه يشتغل موظف استقبال في الاوتيل ده، وبعد فتره لقى حاجات غريبة بتحصل في غرفة 207،  فأصر انه يعرف سر الاوضة دي، وفي كل مرة كان يعرف حاجة كان بيدفع ثمن معرفته ليها، وقليل جدا اللي يعرف يخرج بره الاوضه دي حي بس اللي بيخرج شايل هم الاوضة عيشته فيه، وطبعا جمال نسى انه موظف استقبال خالص، وقرر انه يكشف سر الاوضة دي حتى لو هيعرض حياته للخطر.

 قولولي رأيكم في الcomments  لو عجبتكم الرواية وعايزين تعرفوا قصة ايه المرة الجاية.