أسهل طريقتين لعمل المكرونة
كتبت_نرنورة:
"أقرب طريق لقلب الراجل معدته "
ودي المقولة ال ميختلفش عليها اتنين في العالم كله وأسهل حاجة في الأوقات البرد دي المكرونة بكل انواعها بالصلصة بالصوص الابيض بالجرين صوص وكمان حبيبة الملاين البشاميل ومكرونة بكفتة داود باشا وكمان هنحكي قصتها واحنا بنطبخها تخيلي تكوني طباخة شاطرة وكمان مثقفة ياااه.
مقادير المكرونة بالصلصة :
١)مكرونة
٢)طماطم
٣)فلفل
٤)ملح
٥)قرفة
٦)جنزبيل
٧)شطة
٨)زيت
٨)بصلة مفرومة
طريقة عمل مكرونة بالصلصة
طبعًا دي المكرونة ال لو عملنا حاجة غيرها أبوك مش هيأكلها وهيقول انها عك
أول حاجة هنجيب كيس مكرونة او كيسين بس الاهم يكونوا نفس النوع عشان وقت السوا بيختلف من نوع لنوع
وهنجيب حلة ماية فيها معلقة زيت ومعلقة كبيرة ملح ونحطها على النار
*ملحوظة مبنحطش الزيت والملح في الماء غير لما يغلي ودا عشان جزئيات الماية وهي لوحدها بتأخد حريتها بشكل أكبر وبتغلي بسرعة *
أول الماية مهتغلي هنحط المكرونة ونقلبها باستمرار عشان متلزقش وتعجن
ونجيب طماطم ونضربها وفي الخلاط أو في الكبة أو حتى تبشريها دا مطبخك وأنتِ بس ال متحكمة فيه متخليش حد يأمرك او يفرض عليكي أدوات .
ونجيب حلة ونحط بصلاية مفرومة ونقلبها لحد متدبل وبعدين نبهرها بملح وفلفل أسود ورشة قرفة ورشة جنزبيل وشطة ونحط الطماطم ونبدء نقلبهم ونسيبها لحد متتسبك .
وبعدين نقلبهم ونغرفهم في الاطباق وألف هنا
مقادير مكرونة بالصوص الأبيض بالبسطرمة والزيتون :
١)كيس مكرونة ٤٠٠ جرام
٢)نص لتر لبن(حليب)
٣)ربع كوب كريمة طهي(ممكن نستغنى عنها لو مش موجودة)
٤)جنبة مودزريلا أو تركي او شيدر
٥)ملح وفلفل وجنزبيل وقرفة
٦)زيتون أسود أو اخضر
٧)بسطرمة
٨)فلفل اخضر
طريقة عمل مكرونة بالصوص الأبيض بالبسطرمة والزيتون :
هنسلق المكرونة بكل سهولة زي الوصفة ال فوق
هنجيب مكعب زبدة ونحط فيهم البسطرمة لحد ميتغير لونها وتستوي وبعدين الفلفل الأخضر عشان يتدبل شوية وبعدين هننقلهم من الطاسة ونحط معلقتين دقيق ممسوحين ونقلبهم وقبل ميبدء الدقيق يكون ذهبي نضيف اللبن الساقع ونقلبهم كويس ونحط عليهم البهارات وبعدين نضيف الجبنات والكريمة ونقلبهم لحد ميتحانسوا والخليط يكون تقيل بس مش سميك ونضيف عليه البسطرمة والفلفل والزيتون تقليبه ونحط المكرونة وبعدين نغرفهم في الاطباق وبألف هنا .
تعليقات
إرسال تعليق