الوسواس القهري ocd

                 حكاية شارع من شوارعنا 

كتبت رؤية وائل

هو مش بس الشارع اللي بيفكرنا بدروس ثانوية عامة، لا هو كمان من أهم شوارع اسكندرية الأثرية اللي وراه حدوتة وقصة من احلا القصص اللي ممكن تسمعها وكمان هو من أقدم شوارع العالم اللي مشهورة بالمباني الأثرية والمسارح والسينما، يلا بينا نعرف اي هي قصة شارع فؤاد.

♧قصة نشأته..

مش بس سموه شارع فؤاد لا ده اتقال عليه اسماء كتير اوي وكل اسم بحكاية واولهم " الطريق الكانوبي" وده اسم اطلقوه عليه البطالمة؛ لأنه كان مليان بأعمدة رخامية من بدايته لحد نهايته، وكمان اتعرف ب"طريق الحرية"، وبتتميز مباني شارع فؤاد بالطراز اليوناني الممزوج بالفن الإيطالي المعماري (الفلورنسي).

الشارع ده موجود في محطة الرمل في مدينة اسكندرية، وحالياً في بداية الشارع موجود قسم الشرطة وده كان يمثل مركز الحراسة البريطانية الرئيسى فى اسكندرية، وكان موجود جنبه معبد صغير لسيرابيس مكان نادي "محمد علي" وده حالياً بقى قصر ثقافة الابداع-اكبر نوادي اسكندرية في اوائل القرن ال١٩ وكان من ضمن اعضائه الكاتب والروائي البريطاني" فورستر".

♧معالمه..

الشارع ده موجود في المتحف القومي اللي كان فيلا  لتاجر أخشاب يوناني باسيلي وكانت مبنية على الطراز الحديث وفضل موجود فيها لحد سنة ١٩٥٤، وبعدين بعها للسفارة الامريكية واللي فضلت فيها لحد مشتراها المجلس الأعلى للأثار في ١٩٩٦، واللي ضم مجموعة رائعة من الأثار اللي كانت غرقانه في البحر المتوسط .

حوالي ١٨٠٠ قطعة اثرية من جميع العصور بداية من الدولة القديمة لحد العصر الحديث، ومش بس كده ده موجود في اخر الشارع  ساعة الزهور اللي بتدق ساعتها ديماً وبانتظام ادام حدائق الشلالات اللي فيها بقية آثار اسكندرية الاسلامية منهم: الأسوار القديمة و صهريج الشلالات اللي متكون من ٣ ادوار ومتقسم طول وعرض ل ٥ أقسام ب أعمدة جرانيتية مختلفة الطرز والأشكال، وكمان مقام عبد الله بن علي زين العابدين ومقام يعقوب بن عبد الرحمن موجودين هناك في شارع فؤاد.

♧ الادب والفنون..

شارع فؤاد هو أصل الأدب والفنون في اسكندرية، من ضمن سكانه الشاعر اليوناني"كفافيس"، وكمان اتذكر الشارع ده في واحدة من أهم روايات الأدب العالمي وهي " رباعية الاسكندرية " واللي كتب فصولها الروائي الإنجليزي " لورانس داريل".

وكان من ابطال الرباعية جوستن ونسيم اللي كانوا عايشين في بيت موجود ورى شارع فؤاد وكانت الشخصيات دي ليهم أصل واقعي في الحقيقة، كانوا بيتجمعوا في صالة الشاي ( بسترودس) عشان يفطروا او يشربوا حاجة سخنة وهما بيتكلموا عن الحياة ومشاكلها، وكان أول عرض سينمائي في مصر في واحدة من صلات طوسون باشا في شارع فؤاد في ١٥ نوفمبر ١٨٩٦.

بلادنا ديما مليانة بالحاجات الحلوة والاثار اللي هنفضل فاكرنها بقصصها اللي تخلينا فخورين بثقافتنا وحضارتنا، مش اخر حكاية نحكيها قولوا رأيكم وعايزني احكيلكم حكاية اي المرة اللي جايا.