ما تيجوا نروح جبل كاترين
كتبت-خلود أحمد
كل بلد بتميزها حاجة مختلفة وبتكون فيها واخده أعلى مستوى خصوصاً لو الحاجة دي بنعتبرها أثرية، وده بالظبط اللي بينطبق ع جبل " كاترين"اللي السياح بتجيله من كل مكان عشان يشوفوا أعلى قمة جبلية ف مصر ويستمتعوا فيه بالجو والأنشطة الكتير اللي بتكون هناك، طب متيجوا نعرف تاريخ المكان ده ايه!
جبل كاترين أو زي ما بيسموه جبل" القديسة كاترينا" اللي موجود ف مصر ف محافظة "جنوب سينا"، مش بس كدا ده كمان أعلى قمة جبلية ف سينا كلها، وارتفاعه يبلغ 2.629 م، وغير إنه أعلى قمة لكن بيتميز بجمال شكله خصوصاً ف فصل الشتا اللي بيكون أمطار نازلة ع هيئة تلج بتزين قمة الجبل ومعظم جبال سيناء.
طب ليه سموه جبل كاترين؟ زمان كان فيه قديسة اسمها" القديسة كاترين" من أهم القديسات ف الغرب، ومن أهم القديسات اللي كانت بتنشر المسيحية، بس أُعدمت ف الاسكندرية، وكمان لقوا جثتها فوق الجبل، وعشان كدا اتسمى الجبل بجبل كاترين عشان يخلد اسم القديسة.
ومش بس الجبل اللي اتسمى بإسمها ف نفس المكان موجود دير اسمه " دير سانت كاترين" واللي الرُهاب فيه لقوا جثة القديسة فوق الجبل، وعشان كدا خصصوا مكان ما لقوا جثتها عشان يكون مصلى خاص بها، وكمان خصصوا اوضتين واحدة عشان الحجاج يباتوا فيها، والتانية لتسلق الجبل من ممر ف الجبل.
الجبال ف سيناء بيكون شكلها مختلف تماماً، سينا برغم إنها مكان بسيط لكن مزارتها السياحية فيها عتيقة اوى، زي جبل"كاترين" من أعرق المراكز السياحية اللي موجودة هناك واللي من فوقه بتقدر انك تشوف خليج العقبة وخليج السويس.
الجبال برغم من كبر حجمها بس ناس كتير بتلجأ ليها عشان تحس بالمتعة، المغامرة فيها بتكون مختلفة، تخيل انت موجود فوق سطح البحر بمقدار اكتر من 2 متر، المغامرة بتكون مميزة وغريبة، عشان كدا من اجمل أنواع الزيارات هي زيارة جبل من جبال العالم وخصوصاً لو ليه تاريخ عريق زي جبل " كاترين".
تعليقات
إرسال تعليق